Klókir lesendur

Geta séð Dísiskvís hérna með Borderunum. Svona ef þið hafið áhuga á.




En annars er það að frétta af heimahögunum að Dís fór á Töðugjöld með Dóru og Púka og kynnti sína tegund.

Fluga er svo að fara með Valda í sveitina um helgina þ.a. það verður eitthvað gaman hjá þeim.

Ég er ekki frá því að fráhvarfseinkenninn séu að fara að koma. Það er ekkert sérstaklega kúl að vera alveg gæludýralaus.

En ég var ekki búin að sýna ykkur fínu myndirnar sem ég tók af Dís og Flugu um daginn :D









Eru þær ekki sætar stelpurnar mínar !!!

En ég er ekki enn búin að fatta það að ég sé flutt til útlanda... finnst enn eins og ég sé bara í ferðalagi og sé að fara heim eftir nokkra daga. þetta á nú eftir að venjast, ég fer bara á röltið og knúsa annara manna hunda, sem er sko NÓG af !

Verst að ég get ekki með góðu móti fengið að knúsa annara manna menn... En það kemur nú enginn í staðinn fyrir hann Valda minn, sem ætlar m.a.s. að koma út í september !!! Ég get ekki beðið mig hlakkar svo til :D

En núna ætla ég í bælið, klukkan að verða 11 hérna úti, og bara 9 heima. Smá munur, en það þýðir líka að ég er að vakna klukkan hálf fimm á morgnana að íslenskum tíma...

Jæja fréttaþyrsta fólk

Eruð þið búin að bíða lengi eftir Danmerkurfréttum ???

Tjahh ef ekki þá getiði bara kíkt eitthvað annað hehe

En hérna koma samt Danmerkurfréttir (Brace yourself, þetta verður LANGT)

Ferðin hingað gekk fínt, flugið áfallalaust og ég hitti Guðríði á vellinum og við röltum saman út í vél. Ég reyndar keypti nú mjög lítið á vellinum, nema forláta myndavél (ekki veitti af, hræðilegt að geta ekki tekið myndir til að sýna ykkur). Við komum svo af flugvellinum, tókum leigubíl af vellinum til Albertslund Kollegium í Morbærhaven og komum á svona líka réttum tíma því skrifstofan er ekki opin nema á milli tvö og hálffjögur á virkum dögum... Já ég veit, Danir...

Svo fékk ég lyklana, fann íbúðina og hún er bara svona líka sæt, þægileg stærð og með Brandspanking new ísskáp.

Hurðin mín, íbúðin er númer 18-23


Og m.a.s. búið að merkja mér íbúðina híhí


Og svo sést svona inn í hana, afsakið draslið á gólfinu hehe, ekki búið að ganga frá því þarna





Eldhúsið mitt


Og svo baðherbergið - óvenju stórt m.v. danska staðla


Við komumst í Jysk þennan dag og keyptum sæng, kodda, handklæði og eitthvað smotterí. Þá um kvöldið kíktum við aðeins niðrí bæ að hitta vini Guðríðar, og Guðríður lenti í því leiðindaatviki að tapa töskunni sinni með veskinum og símanum og öllu draslinu... Ömurlegt !

Daginn eftir byrjaði prógramið, við mættum í skólann um hálf tíu, hálftíma of seint þar sem að við tókum óvart strætóinn í vitlausa átt. En þegar við loksin mættum fórum við í hópana okkar og það var stanslaust prógramm allan daginn, allskonar team building leikir til að hjálpa fólkinu að kynnast og svona. Þá kom fyrsta alvöru reynslan á dönskukunnáttuna hjá manni en hún var skárri en ég hélt. Við fengum svo svakalegt Welcomeshow, með svakalegum atriðum, nekt og öllum pakkanum.

En þegar þessum degi lauk, kom svo að Rusturnum. Og það var sko SVAÐALEGUR túr !

Það var soldið vesen fyrir okkur að koma öllu draslinu og hjólinu niður í skóla þar sem að ferðin okkar var hjólaferð. En við komumst niður í skólann á endanum, og m.a.s. á réttum tíma. Svo skelltum við farangrinum okkar í hrúguna, hittum Sonju skvísu sem fór í sömu ferð og við, og fórum svo í hjólahópana okkar. Ég var Jernhest og við fórum fyrst af stað. Á leiðinni stoppuðum við á nokkrum stöðvum þar sem við áttum að leysa ýmsar þrautir og fengum stig fyrir, og svo fengum við auka stig fyrir að búa til alskonar lög, gefa eldri nemunum bjór, knús, kossa og ég veit ekki hvað og hvað.





Allt í allt hjóluðum við einhverja 30 kílómetra þennan daginn, og þar sem að þetta er allt flatt þá varð maður nú ekkert svakalega þreyttur.

En, þegar við komum á leiðarenda, þá blasti nú við áhugaverð sjón. Ég vissi að við vorum að fara að gista í tjöldum, og að þetta væri útileiga, en það sem beið okkar hefði ég aldrei látið mér detta í hug !

Sjáiði bara sjálf


Tjaldbúðirnar - matartjaldið og partýtjaldið


Og svo röltum við okkur að fara að tjalda tjaldinu okkar


Grindin átti s.s. að líta svona út (sem hún og svo gerði)


Byggingarefnið fyrir tjaldið okkar


Tjaldið að verða tilbúið (var búið til úr trjábjálkum og segldúk)


Annar hópur að byggja tjaldið sitt


Svo skoðuðum við okkur aðeins um svæðið og biðum eftir hinum hópunum. Við vorum staðsett við stöðuvatn sem var hægt að synda í (og það gerðu það nú flestir). Svo var eldað fyrir allan hópinn og farið að sofa. Ég komst að því að svefnpokinn minn var ekki alveg gerður fyrir að sofa í utan dyra (furðulegur svefnpoki það, en þetta fær maður þegar maður verslar ódýrt í Jysk) og ég hristist og skalf alla nóttina... Ég svaf svo í öllum fötunum allan tímann, innvafinn í svefnpokann, og hristist og skalf allar næturnar.

Næsta dag vorum við vakin með látum klukkan átta um morguninn, en við höfðum s.s. flutt klukkuna fram um tvo tíma m.v. danskan tíma til að nýta sólarljósið sem best, þ.a. klukkan var 6 að dönskum tíma, og 4 að íslenskum tíma. Þær voru mættar nokkrar til að draga fólkið í morgunleikfimi með svaðalega hallærislegum barnalögum. Ótrúleg orka alveg hreint !

Svo var svaka prógram allan daginn með leik sem gekk út á það að við áttum að finna matinn okkar út um allan skóg. Við fórum á ýmsar stöðvar, þar sem við fengum svo stig fyrir frammistöðu, söngva, smeðjuskap, knús, kossa og hvað við náðum að gefa leiðbeinendunum mikið öl. Þennan dag fékk ég að prófa nokkuð sem ég hef ekki enn prófað, en það var að veiða þessa líka fínu laxa, flestir hátt í 10-12 pund, með berum höndum !

Hópurinn kominn saman - ég var blár bavíani - hence the costumes


Svo voru rauðu birnirnir


Og grænu mömburnar


Og svo byrjaði enn eitt leikritið - Danirnir fá allavegana 10 af 10 mögulegum fyrir ímyndunarafl


Og auðvitað fylgjast allir rosalega vel með


Meira skemmtilegt leikrit


Og svo tók ég engar myndir fyrr en við komum að þessari stöð


Og já, ofan í barnasundlauginni voru 5 laxar sem við áttum að veiða - með berum höndum


Og sumir skelltu sér svo bara út í


En ég setti svo bara myndavélina niður og fór að veiða, og tókst að veiða tvo laxa alveg sjálf !!! Alveg ákveðin tækni við það sko !

Svo fórum við á flóðhestaveiðar


Fíni flóðhesturinn


Ágætis vegalengd sem við áttum að kasta


Svo var fiskurinn okkar náttúrulega eldaður og borðaður - smakkaðist líka svona vel


Hafði ekki prófað eldbakað, innbakað ferskan lax áður


Daginn eftir mættu nokkrir dýralæknar til að ræða við okkur um starfsmöguleika fyrir dýralækna að námi loknu og svona, og einn hafði líka svona fínan fylgdarsvein



Á laugardeginum rigndi svo, og rigndi og rigndi og rigndi sem endaði með því að við fórum heim degi fyrr en ætlað var og komum því heim í gær.

Allt á floti í tjaldinu mínu


Og meira á floti


Og það rigndi og rigndi


Tjöldin útbúin fyrir rigninguna


Og eina tjaldið sem stóðst veðrið var tjaldið hjá hópnum hennar Sonju en þau voru svo sniðug að tjalda inn í skjóginum


Svo drösluðum við draslinu okkar og hjólunum með okkur, fundum hótel sem hringdi á leigubíl fyrir okkur og við fórum heim.

Við gerðum s.s. nákvæmlega sömu mistökin og furðulegu útlendingarnir sem koma heim til Íslands og eru hreinlega engan vegin nógu vel útbúnir fyrir íslenska verðáttu. Við vorum engan vegin viðbúnar danskri veðráttu og engan vegin útbúnar fyrir útileigu í danski veðráttu (þar sem rignir reyndar alltaf bara beint niður og aldrei á hlið...

En núna byrjar skólinn í fyrramálið, það verður fjör !!! Munið svo bara að fylgjast vel með.

Hvernig ætlar hann að vera á litinn ??

Já, það er soldið forvitnilegt að pæla í því hvernig hann Þorri litli ætlar að vera á litinn.


See for your self















En að öðru - 6 dagar...

181 stig – flugmiði – bréf – íbúð

Jahá

Það er ekkert lítið sem er að gerast hjá manni þessa dagana ! En við skulum byrja á byrjuninni og viðhalda þessum “dagbókarfíling” sem virðist vera kominn á blogghefðina hjá mér.

Við Fluga skelltum okkur í vinnupróf DÍ um daginn. Prófið, framkvæmd þess og dómstörf voru líkt og maður á von á hjá svona góðum klúbb, og vonandi heldur þetta áfram með þessu móti. En við byrjuðum s.s. um morguninn á hlýðni I prófinu, við Fluga mættum tímanlega (Dís var reyndar með líka en hún var í bílnum á meðan). Þegar búið var að merkja út svæðið og hundar og dómari voru tilbúnir hófst prófið á “að skoða tennur”, Fluga stóð sig mjög vel og reisti sig ekki upp heldur sat sem fastast eins og þaulvanur sýningarhundur :Þ Við fengum allavegana 10 fyrir þann hluta, sem varð reyndar eina tían þennan daginn hjá okkur. Í atriðinu að liggja kyrr í hóp þá var Fluga komin í rétta stöðu, en ég var ekki nógu skýr þ.a. þegar ég lagði af stað frá henni þá fylgdi hún mér eitt skref. Hún lá samt sem fastast allan tíman, haggaðist ekki hænufet og leit ekki af mömmu sinni. 9 fengum við fyrir þetta atriði. Aðrar einkunnir er ég ekki alveg með í handraðanum en ég skelli inn einkunnarblaðinu þegar það kemur þ.a. ef ég bulla eitthvað með hinar einkunnirnar þá verðiði bara að fyrigefa mér það. Hælganga í taum gekk vel, nema hvað að það er alltaf sama “problemið”, þ.e. hún heldur sig alltaf 30 cm frá fætinum á mér. En kontaktinn var fínn og “automatic sitt” því sem næst fullkominn. Við fengum 8,5 fyrir þennan þátt. Hælganga laus gekk svo alveg glimrandi, flottur kontakt og við bara smullum saman þarna, enda fengum við 9 fyrir hælgöngu laus og ég var alveg himinlifandi því þetta er það atriði sem hún var slökust á í síðasta prófi. “Liggið” í liggja á skipun er ekki nógu hratt þ.a. við fengum ekki fullt hús stiga þar og að stoppa á göngu var greinilega eitthvað ryðgað líka (ekki búin að æfa það mikið undanfarna daga... vikur.... mánuði... ) þ.a. ekki var fullt hús stiga þar heldur. Svo kom að síðasta atriðinu, hoppa yfir hindrun, sem reynist henni gífurlega auðvelt eftir að hafa stundað hundafimi alla æfi. En nei, Silja litla klúðraði aðeins þarna og var ekki með nógu skýra hælskipun áður en ég lagði af stað þ.a. Fluga sá hoppið og ætlaði af stað (enda vissi hún sko alveg hvað hún átti að gera !!) þ.a. þar fengum við bara 9,5. En hey, þetta var nánast fullkomið. Svo var ég líka rosalega ánægð með einkunina fyrir samstarfsvilja en þar skoruðum við 9 !! Bara sátt ! En þrátt fyrir að við höfum “misst niður” þrjár tíur þá lækkuðum við einkunina okkar frá síðasta prófi bara um 0,5 stig og við stóðum uppi með 181 stig og meira að segja fyrsta sæti ! Ef við værum úti þá myndi okkar vanta eina fyrstu einkun í viðbót til að verða LP I :D

En Fluga er s.s. komin með smá forskot á að verða “dobermann hundur ársins” hjá DÍ hehe

En já að öðru, ég fékk afar skemmtilegt email í vikunni þar sem að mér bauðst íbúð á Kollegie í Albertslund, sem ég stökk á með látum !!! Íbúðin er reyndar lítil, soldið mikið lítil, alveg 25 fermetra lítil, en ég þarf svosem ekki svo mikið í rauninni. Svo kom bréfið frá skólanum heim í gær þ.a. það er orðið fullkomlega formlegt að ég er komin inn í dýralæknanámið. Þannig að núna er ég búin að skrifa undir leigusamninginn, búin að kaupa flugmiða og allt að verða ready. En ég fer s.s. út 18 ágúst.....

Eftir 17 daga

Scheize !

Margt að gerast

Já, þó svo að maður sitji fyrir framan tölvuna allan daginn alla daga, þá gefst ekki alltaf mikill tími til að blogga.

Anyhow

Það er nú sitthvað búið að gerast “síðan síðast”. Við fórum á Landsmót, mótið var skemmtilegt, aðstaðan á tjaldsvæðum ÖMURLEG !!! En það bætti þó aðeins úr skák að Gosi minn kom heim með gullverðlaun af Landsmóti, og flokkast því sem “landsmótsvinner”. En mamma og Brynja tóku þátt í fyrstu Þolreið Landsmóts hestamanna, þar sem að riði var annars vegar frá Selfossi og að Þjórsjárbrú, og hins vegar frá Þjórsárbrú og inn á mótssvæðið (svona boðhlaupsþolreið). Þær stöllur gerðu sér lítið fyrir og sigruðu þolreiðina, fengu svaka dollu og flugmiða í verðlaun. Ekki amalegt hjá þeim, en núna get ég með sanni sagt að ég á Landsmótsvinner !

En eins og ég sagði þá var mótið skemmtilegt, náði að hitta Drífu og litla yndið hennar, sem er bara æðisleg !

Við horfðum svo á hestinn sem við áttum pantað undir með Artemis vinna A flokkinn, hann Aris frá Akureyri. Það vildi reyndar svo skemmtilega til að þegar við sátum í brekkunni sest maður við hliðina á okkur. Svo þegar A flokkurinn byrjar þá byður hann Valda um að benda sér á Aris, sem Valdi gerir, og svo kom það upp úr pottinum að þetta var semsagt rætkandi Arisar, og við náðum að kjafta hressilega við hann. Alltaf gaman að fá “insider info” um hestinn, þ.e.a.s. hvernig hann var í uppvexti, tamningu og svona. Það skiptir líka máli, og jafnvel meira máli heldur en það sem þú sérð beint fyrir framan þig þegar hesturinn mætir “tilbúinn” á völlinn í dóm eða í keppni. En svo þurfum við soldið að pæla hvað afkvæmið á að heita, því ég var búin að heita því að fyrsta hesturinn sem myndi fæðast undan Artemis myndi heita Ares (bróðir Artemisar í grísku goðafræðinni – nafnahefð í gangi sko) en það er varla hægt að vera með Ares, undan Aris. Þ.a. það gæti alveg farið þannig að ef það fæðist hestur að hann myndi heita Appolo, en það er auðveldara ef það kemur meri því þá höfum við Aþenu og Afródítu. En reyndar eigum við ekki allt folaldið heldur verður það í sameign með tengdó, þ.a. hún gæti alveg viljað hafa eitthvað um málið að segja. Þetta kemur allt saman í ljós.

En svo var Landsmótið búið, er búin að röfla aðeins yfir því á öðrum stöðum þ.a. ég nenni ekki að gera það hérna.

En um síðustu helgi skelltum við okkur í íþróttadeildinni í göngu, við ætluðum að ganga Leggjabrjót, og komumst alveg vel áleiðis en snérum við vegna veðurs. Frásögnina af ferðinni má finna á blogginu hjá Kötu ef þið viljið kíkja, en af gefnu tilefni ætla ég að ræna einni mynd frá henni til að sýna ykkur uppáhalds ferðamátann hennar Dísar.

En við erum búnar að plana að endurtaka leikinn seinna, áður en ég fer út. Það er sko alveg á hreinu ;)

Verð að viðurkenna að ég hef gerst sek

Um kæruleysi. Já, Silja litla var kærulaus !

Eins og sumir vita þá hef ég hægt og rólega farið að taka upp danska siði, til að undirbúa mig betur undir flutninginn og svona. Einn af siðunum sem ég hef byrjað á er að hjóla út um allt, hjóla í vinnuna og út í búð ef þarf og svona. Nema hvað, að þegar Silja litla fór og keypti sér hjól, þá lét hún nú setja ýmislegt á það sem hún taldi þurfa (bretti og svona) en hún gleymdi að kaupa einn hlut.

Hjálm.

Svo fór Silja litla að hjóla í vinnuna í morgun. Alveg grandalaus brunaði hún um stígana, og brunaði víst aðeins of hratt, lennti fyrir utan veg og á steinum. Og FLAUG af hjólinu. Já það er víst rétt. Ég datt !

Og hafði auðvitað engann hjálm (og ég sem fer ekki á bak hjálmlaus). En það fór nú betur en á horfðist. Ég stóð upp, með smá skrámur hér og þar, ekkert alvarlegt. En síðan þegar ég var komin á ferð aftur er mér litið niður, og mig hryggir að tilkynna að fallið náði víst einu fórnarlambi.

Forláta Adidas stakkur sem ég var í, var rifinn í tætlur !

Þannig að ef þið þekktuð stakkinn, og þótti jafnvel vænt um hann, þá þykir mér leitt að þurfa að tilkynna ykkur fráfall hans. Hvíl í friði, blái stakkur.

Nýja folaldið og sumarbústaðarferð

Við nýttum góða veðrið til að skella okkur austur og eyða helginni í sveitasælunni. Það var reyndar stór ástæða fyrir því að við fórum austur, en á 17 júní skelltum við okkur nefnilega í sveitina til að athuga hvort það væri komið folald. Viti menn, okkar beið lítill drengur, frekar nýlega fæddur. við tókum nokkrar myndir af honum um helgina, og hérna fáið þið að sjá í fyrsta sinn - Þorra frá Reykjavík.



Við völdum vandlega hestinn á þessa meri, þar sem að hún er að mörgu leyti rosalega góð, en hennar helsti löstur er slakur háls og að hún á rosalega erfitt með að kverka sig. Fyrir valinu varð Þokki frá Kýrholti, en hann hefur akkúrat hálsinn (hæfileikana og ýmislegt annað) sem við vorum að leita eftir. Ég reyndar þóttist vera nokkuð viss um að fá brúnt folald, þar sem móðirin er brún og undan brúnskjóttu og jörpu, faðirinn er brún, foreldrar hans eru brúnir... og það kom rauður hestur. Tvístjörnóttur meira að segja !

En við nánari skoðun get ég ekki sagt annað en að ég er rosalega hrifin af honum. En þið skuluð bara meta það sjálf hvaðan hann fékk hálsinn sinn ;)









Eigum við að ræða þennan háls eitthvað !



Skotturnar fengu náttúrulega að koma með í sveitina, og læddust inn á nokkrar myndir eða svo



Daddara, nú skal smalað !



Uppáhalds myndin mín af Flugu þennan daginn



Og svo var tækifærið gripið og leikið sé við Stubb



Eiginlega eina myndin af henni "standandi" 12 vikna





Og svo gerðust undur og stórmerki. Fluga samþykkti að leika sér við Dís, og fannst það bara nokkuð gaman að draga þetta hvolpaskott um grasflötinn.



En það eru fullt af fleiri myndum í myndaalbúminu ef þið viljið kíkja